Tâi-bûn-hē soán-siu: Koa-á-chheh soán-tho̍k
Lô-má-jī ha̍k-si̍p sim-tek
Goá o̍h Tâi-gí Lô-má-jī kàu taⁿ í-keng ū chi̍t toāⁿ sî-kan ah, mā ū chi̍t koá sim-tek. Lô-má-jī ê hó-chhù sī hó o̍h hó hoat-im, m̄-bián hoan-ló jī beh án-choáⁿ siá he̍k-chiá sī án-choáⁿ tha̍k, in-ūi ē-hiáu kóng ē-hiáu tha̍k tio̍h bô siáⁿ-mih su-siá ê būn-tê. Ē-hiáu kóng Tâi-gí ê lâng koh khah han-bān siōng che o̍h kúi kó goe̍h tio̍h ē-hiáu siá ah, hām Hàn-jī sio pí, koh khah kín mā ài sió-ha̍k sì, gō͘ tang chiah ū châi-tiāu chiong siông-iōng Hàn-jī o̍h liáu, hō͘ lâng kám-kak chin khin-khó, mā m̄-bián tī hia oan-ke-niû-chè chhá siáng ê jī chiah tio̍h.
Tān-sī mā ū chi̍t koá khoat-tiám. Lē-jû kan-taⁿ ē-sái siá hoâiⁿ ê, m̄-koh chāi goá lâi khoàⁿ chi̍t ê khoat-tiám m̄ sī siáⁿ-mih toā būn-tê, in-ūi hiān-chhú-sî sè-kài siōng ê chú-liû su-siá mā sī hoâiⁿ ê, tio̍h sǹg sī Hàn-jī ê hoat-goân-tē Tiong-kok mā sī kāng-khoán.
Koh, su-siá ia̍t-tho̍k ê sok-tō͘ pí Hàn-jī bān, chō-chiâⁿ bô hiah si̍t-iōng, ū-sî-chūn tha̍k ē chhut--lâi khiok bô hoat-tō͘ hām sû ê ì-sù liân-sióng chò-hoé. Che kúi ê būn-tê goá jīn-ûi sī tùi chit ê gí-giân kap bûn-jī bô hiah se̍k-sāi ê goân-in. Tio̍h chhin-chhiūⁿ gún chit-má tha̍k Hàn-jī pí tha̍k chù-im hû-hō͘ khah kín, tān-sī sū-si̍t siōng Hàn-jī sī khah oh ê, tio̍h sī in-ūi gún tiāⁿ-tiāⁿ chiap-chhiok Hàn-jī, tian-tò chiong chù-im hû-hō͘ khoàⁿ chò sī im-phiau niā-niā.
Iáu-koh-ū, Pe̍h-oē-jī ê liân-jī-hō ê kui-hoān iáu-boē thóng-it, pí-jû “chi̍t ê”, “jú lâi jú hó”, “nā sī”, “sio ì-ài”...téng-téng, chit khoán iōng-hoat, in-ūi hi-sû ê koan-hē, chin pháiⁿ tēng-gī.
Siōng boé chi̍t ê būn-tê, mā sī siōng toā ê chó͘-gāi sī siā-hoē siōng tāi-to-sò͘ ê lâng iáu-koh khoàⁿ bô Tâi-gí Lô-má-jī, bô hoat-tō͘ iōng chit thò bûn-jī lâi thoân-pò͘ hō͘ tāi-pō͘-hūn ê Tâi-gí cho̍k-kûn. Ē-hiáu kóng ê lâng hām ē-hiáu tha̍k-siá ê lâng sio pí, boē chhiau-koè 5% , sīm-chì ū chin chē lâng jīn-ûi ē-hiáu kóng kap thiaⁿ tio̍h hó, khah pâi-thiat--ê jīn-ûi Lô-má-jī sī hoé-chheⁿ-bûn, che sī in-ūi ta̍k-ke tùi Lô-má-jī ū khek-pán ìn-siōng, mā tùi Hàn-jī ū chhò-ngō͘ ê bê-su.
Só͘-í goá jīn-ûi ài chhui-sak chhut--khì tio̍h ài koáⁿ-kín chiong chit kui ê būn-tê kai-koat, hō͘ koh khah chē ê lâng ē-tàng chiap-la̍p Lô-má-jī, m̄-koán sī beh chiâⁿ-chò bûn-jī iáu-sī im-phiau lóng bô iàu-kín. In-ūi kan-taⁿ ū hó ê im-phiau kap bûn-jī, chiah ū châi-tiāu hō͘ gí-giân ê oa̍h-le̍k kè-sio̍k pó-chûn.
留言列表
